ژاغان نامان مطالعہ (Toponymy) بو دلچسپ شغل۔ اکثر ژاغان نام بظاہر بے معنی سریئنی۔ مگم حقیقت ہیہ کیہ دی نام بے معنی نو بوئے۔ ژاغان نامان دی اولہ کیہ نو کیہ معنی بوئے مگم بو زمانہ شوخڅیکو، وا مختلف وار کوراک رویان لیگینہ گیتی ہے نامان شکل بدل بیتی ہوݰ کوریکو بݰ نو بونی۔ ݯھترارو ژاغان نام دی بو پرانو بیکین ہیتان معنان معلوم کوریک بو مشکل۔ تاہم کوششو سورہ بعض نامان اصلو معلوم کورین بویان۔ ہیہ سورہ باقاعدہ تحقیق کہ کورین ہوئے اکثر نامان بارا کیہ نو کیہ معلومات حاصل بوئے۔

ژاغان نام مختلف وجہو سورہ لکھین بوئے۔ مثلاً کیہ شخصیتو نامہ، کیہ قومو نامہ یا علاقو قدرتی شکل وصورتو سورہ۔ کیہ شخصیتو نامو سورہ ژاغو نام ہتے وختہ لکھین بوئے کہ ہسے ہے ژاغو اول آباد کوری استائے۔ ݯھترارو بو کم ژاغہ نو غ آباد بیرو۔ اکثر ژاغہ ہزارہا سال پروشٹار تان آباد بہچی گیتی شینی۔ کیہ خاص قومو نامہ دی ژاغہ نیکی کوریکو کہ کیہ دی دیہہ ہاݰ نیکی کہ ہتیرہ صرف ای قوم اسور۔ دیہان بعض حصہ کیہ قومو یا فردو نامو سوم منسوب شینی، مثلاً داد خاندوری، کھانان دور، شاہ کبیران دور، خولو دور، باڈان دور، رومان دور، دراخانان دیہہ، شکران دیہہ۔ ݯھترارو اکثر ژاغان نام ہیتان قدرتی شکل وصورتو سورہ لکھی شینی۔ مثلاً ڑانگہ (دروس)، کورو (دروس، ایون، ژوغور)، اسپاغ لشٹ، کھوڑ (بروز، مستوج)، پہان لشٹ، ݰا چار، راغ، چرن، قاقشلشٹ، کروئے جنالی، کورئے گولوغ، ݰا گرام، اوتھول۔

چھترارو موجودہ اکثر روئے (کھو، کلاݰ، ڈنگیریک، دمیڑی، ارندوئی) انڈو آرئین نسلو ای چوٹ داردی گروہو سوم تعلق لکھونیان۔ ہمیت جنوبو علاقار وخت وختہ گیاؤ ہیہ را آباد بیتی اسونی۔ ماہرین رینیان کہ کلاݰ اوچے کھو ݯھترارہ گیکہ ای روئے اوشونی وا توری ݯھترارتو حال بیرو وسط ایشیار گیاک رویان سار متاثر بیتی جنوبو رویان سار پھوک خور ہونی۔ ہمی تبدیل بیر رویانتے "کھو" نام نیشیتائے وا ہیتان واروتے "کھوار"۔ ہیہ وجہ کہ بعض ژاغان نام ہتے قدیم زبانہ شینی، کیاغ کہ کھوار اوچے کلاݰوار علٰحیدہ بیکار پروشٹی ہیہ را رائج اوشوئے۔ لٹکوہو ژاغان نام بدخشی، یارخونو ترکی اوچے وُخیک وار وا ڑاسپرو بروشسکی (ویرشیکوار)۔ ممکن شیر کہ ای پھتی ژاغان نام ہاݰ دی بونی کہ ہیتان موجودہ کیہ وارو سوم تعلق نو بوئے۔ ہیت یقیناً ہتے رویان لکھیرو بونی کا کہ انڈو آرئین رویان سار پروشٹی ہیہ علاقا اسیتانی۔

ہدایت الرحمٰن ریران کہ  خور ژاغار گیرو روئے ݯھترارہ آباد بیتی تان اصلی وطنہ دیہان نامان  ہیارہ دیہانتے لکھی اسونی، مثلاً راغ اوچے کوغذی نامین دیہہ بدخشانہ دی شینی۔ ہیہ کوروم نوغ زمانا دی بیتی شیر۔  دیرو اڑغانی ݯھترار شہرہ تان ژاغوتے ریحان کوٹ نام لکھی اسونی۔ ہیہ نامو سوم ژاغہ دیرا دی شیر۔ 

ہیارہ ای کما ژاغان نامان ممکنہ اصلو معلوم کوریکو کوشش کورونو بیتی شیر۔ ہمیتان موژار بعض محض گمان، یقینی نو۔ ہیہ سورہ کوروم کوریکو بو گنجائش شیر۔ ہیہ کورومو پروشٹی الیکو علاقو بارا معلوماتہ بو اضافہ بوئے۔ ہیہ موضوع طالبعمان بچین تحقیقو دی جم موضوع ثابت بوئے۔ ہیہ بارا پسہ رائے وا تجویزان شکریو سورہ قبول کوری ہیہ نیویشرو حصہ ساوزین بوئے۔

ڑاسپُر:

(بروشسکی) داسپُر بمعنی غیر آباد وادی۔

ہرچین:

(بروشسکی) ہرے چن (بمعنی سیریو بوئیک) بروشسکیہ چیلی بوہتوتے ریر۔کھوار "چیلی بوہتو" دی غالباً اویلہ "سیری بوئیک" بوئے۔ سیری گریݰپؤ اویلو فصل بیکین ہورو چیلی بوہتو بو نقصان کونی۔

ݰائی داس:

(برشسکی) داس بمعنی بنجر میدان بطور لاحقہ ژاغان نامان سوم گوئے۔ مثلاً گلگتہ اوشکن داس، کونو داس وا یسینہ برانداس۔ ہیہ لاحقہ توری ݯھترارار گنی کاغان وادیہ وا بلتستانہ پت ژاغان نامان سوم ݯوکی شیر۔ ہموغار معلوم بویان کہ قدیم زمانا ہمی تمام علاقان زبان بروشسکی بیرائے۔

یارخون:

(ترکی) یارکن، بمعنی بوختہ بوختی ترنگ وادی۔ یارخونو بالائی دیہان نام اکثر وُخیک وار۔ مثلاً یوکݰوکوت، ݰاتکیپوت، نخچیر دم، ݰوئست وغیرہ۔ جوش ݯھویو صدیی کاشغرو باچھا عبداللہ خان یارخون لشٹہ گیتی ہیرہ نوغور دیکو بچین ژاغہ لوڑی بوغدو بیرائے مگم اچی گیکو موقع نو نیسی شیر۔ ہتو نامہ ہیہ ژاغوتے عبد اللہ خانو لشٹ راک بیرانی۔ اچہ زمانا بیریار بار بار حملہ بیکین بالائی یارخون غیر آباد بیرو بیرائے۔ امان ملک میتار مستوچو گنیکار اچی تان ژاؤ افضل الملکو مستوچہ حکمران کوریکو ہسے بالائی یارخونو اچی آباد کوری ہموتے افضل آباد نام لکھیرو بیرائے۔

سنوغر:

(کھوار) "سُونو نوغور" یعنی سُونو سوم نوغور۔ ہیہ دیہہ بو قدیم زمانار نوغور بہچی گیتی شیر۔ اویلو نوغور ڈوک دورہ بیرائے۔ اچہ ہتے ژاغا نوغور دیرو بیرانی کورہ کہ ہنیسین "نوغور" نامین محلہ آباد۔

میراگرام:

(کھوار) میرو گرام یعنی میرو دیہہ۔ ظفر اللہ پرواز ریران کہ ہمو معنی "زومو گوݯہ دیہہ"۔ میراگرام نامین کھاڑ دیہان سورہ ݱانگ زوم شینی۔

اَوی:

(قدیم کھوار/ کلاݰوار) ترنگ یا باریکی ژاغہ۔ آوی نامین تروئے ژاغی شینی۔ بونیار توری، لوٹ اویرہ، شغورہ۔

بونی:

ظفر اللہ پرواز ریران کہ بونی موجودہ بونیو ای څیق حصو نام اشوئے۔ ہے ژاغہ کھیوتے کہ ہنیسے مرݯ موڑی رینیان گولو اپاکہ آباد اوشوئے۔ ہے ژاغو نسین تور اوچے گونی جنگل اوشوئے ہیغین ہوروتے "تور گونی" راوتانی۔ ہیہ لفظ مختصر بیتی "گونی" اچی "بونی" بیتی شیر۔

چرن:

(قدیم کھوار/ کلاݰوار) مال روݯھینی ژاغہ۔

کوراغ:

(فارسی/ کھوار) کروئے مال روݯھینی ژاغہ۔

اویر:

(قدیم کھوار/ کلاݰوار)ہیہ وݰکی۔ چرنو اویر، لوٹ اویر ، ارکاریو اویر۔

کھو :

کھو نامو بارا تروئے امکانات شینی:

1. (قدیم کھوار/ کلاݰوار) "کوئی" بمعنی آباد وادی۔ کلاشہ زبانہ ہنیسے دی ہیہ "کوئی" تان۔ کلاش "جنجریت کوئی" رینی۔ کھوارہ ہیہ تبدیل بیتی "کُہ" غیری شیر۔ موڑ کھو اوچے تور کھو شروعہ "موڑی کوئی" بوئی۔ کہوار کلاش وارو سار علٰحیدہ بیکو ہیہ "موڑی کُہ" وا اچہ موڑی کھو" بیتی شیر۔
2. (فارسی) کوہ بمعنی زوم۔ زومان موژتو علاقانتے میدانی علاقو روئے عام طورہ کوہستان رینی۔ ممکن شیر کہ بدخشانو روئے ݯھتراروتے کوہستان رے اسونی وا ہے نام لش لش بیتی "کھوستان" بیتی شیر وا اچہ کھو بہچی شیر۔
3. (ممکنہ طورہ انڈو آرئین) بدخشانو وا ݯھترارو پرانو فارسی کتابین تورکھوو موڑکھو نیویشیکو ژاغا توری کوب موڑی کوب نیویشی شیر۔ ہیغار علاوہ تورکھؤو ای لوٹ دیہو نام ویرکوب دی شیر۔ بو ممکن شیر "کھوو " لفط اصلہ کوب بوئے۔ کوب لفظو معنو دریافت کوریک مشکل نو، پھوک کوشش کوریلیک۔ ای امکان ہیہ شیر کہ کوب انڈو آرئین زبانان کیہ پرانو شکلہ ٹھینگ یا ڈوک ژاغوتے ریرا۔

تیریچ:

(قدیم کھوار/ کلاݰوار) "تِرچھی" بمعنی نیروغی یا تھروسکی۔ ہیہ وادی باقی وادیان مخالف سمتہ شیر۔

اُتھول:

(قدیم کھوار/ کلاݰوار) ݱانگ ژاغہ۔

برینیس:

(کھوار) اصل لفظ "باریسون" بوئے یعنی بار باریئکو ژاغہ۔ ہیہ دیہو سورتو ادرخ قدیمہ جنگل بوئے۔ ہئے ٹھوک اوچے کندو ہنیسین دی شینی۔ زومار داران چھینی راکھیݰی پست خامیئے کورہ کہ اولاغانتے یا کریمہ باریئے آوانی، ہتے ژاغوتے "باریسون" رینی۔ غالباً قدیم زمانا ہیہ را داران یو خامئے باریئکین ہموتے "باریسون" نام نیشی شیر۔ اچہ بو استعمال نیتی ہیس "بارینس" بیتی شیر۔ مگم ہیہ دیہو رویانتے ہنیسے دی "بارینسی" نو " باریسنی" رینی۔

راغ:

(فارسی) سبزہ زار/ چراگاہ۔

ݯھترار:

(کھوار) ݯھیترو نس۔ ݯھترار اصلہ ٹاؤنو ہتے حصو نام کیاغ کہ ݯھترار گولو سورہ آباد۔ یعنی گولدور، ݱانگ بازار، مغلاندہ، موڑ دہ، زرگراندہ وا بوغورو علاقہ۔ ای روایت ہیہ کہ ݯھترارشروعہ صرف اتالیغی دورو نام اوشوئے۔

ݱانگ بازار/ مغلان دہ:

(کھوار) ݯھترارو پرانو نوغور موجودہ ݱانگبازارہ اوشوئے۔ ہیس صرف نوغور تان نو بلکہ ہے اندرینی لوٹ آبادی، بازار وا مغژیت دی اوشوئے۔ نوغور 1850 سالار اچی موجودہ ژاغا ساوزیئکار اچہ دی بازار ہے ژاغا تان بہچیتائے۔ ہیہ وجہیں ہے ژاغوتے بازار ریکہ پرانی۔ اچہ مہمان سرایو ݰویہ نوغ بازار ساوز بیکار اچہ پرانو بازاروتے ݱانگ بازار ریکہ پرانی۔ ݱانگ بازارو پرانو نوغورو اویلو دفعہ کاشغرو مغل حملہ آور ساوزئے اسیتانی۔ ہیتان فوجیان حال بیکو ژاغوتے "مغلان دہ" نام نیشتائے۔ ہے ژاغہ دی نوغورو اندینی اوشوئے۔

سینگور:

(نامعلوم) دیر سوات کوہستانو مقامی روایت شیر کہ قدیم زمانا ہے ژاغو سورہ حملہ بیکو ہیتان ای سردار موسینگور تان قبیلو گنی اوشٹوری انین ݯھتراروتے بی اسور۔ ممکن شیر کہ سینگورو نامو ہوروسوم کیہ تعلق بوئے۔ مزید ہیہ کہ "شاہ میر" نام دی کوہستانیان روایاتین گویان۔ سینگورہ زیادہ قوم شاہ میرے اسونی۔

اوژور:

(نامعلوم) کوہستانو ای خور رویات ہیہ کہ ہیتان ای سردار "اوژور دادا" خور رویان گنی ݯھتراروتے بی اسور۔

ژوغور:

(کلاݰوار) ژوغورو قدیم آبادی دواݰیݰ ۔ ہیہ اصلہ ای بوختو نام۔ ہے بوخت قدیم زمانا کلاݰان ای مقدس زیارت گاہ اوشوئے۔ خاص کوری سینہ مشرقو وݰکی روئے مثلاً بروز، شیشی کوہ، دروس وغیرار ہیرہ زیارت گیاک بیرانی۔ کلاݰان ہموݰ زیارت گاہ کورہ کہ شینی ہتیرہ دارار استورو جو کھماڑ ساوزئے کھانجہ ݯکیئنی۔ دواݰیݰہ دی غالباً ہاݰ تان استورو کھماڑ اوشونی۔ ہیہ وجہین ہیہ ژاغوتے "دواݰیݰ" (اردو معنی: دیوتا کا سر) نام نیشیرو بوئے۔ "گور" دی قدیم انڈو آرئین زبانین "دیوتا" معنا استعمال بوئے۔ ہیہ را ہیہ لو قابل ذکر کہ فرامرز خان اسکرا مصنف "چینی نژاد" نیویشیران کہ ژوغور اصلہ "جو گور" اوشوئے وا دواݰیݰ اصلہ "دو راکھشس"۔

بکر آباد:

(فارسی) ہیہ اصلہ "بابر آباد"۔ ہموتے اولو دفعہ ژوئے شاہ بابر میتار نیزیرو بیرائے وا ہتو نامہ ݯکئے ہمو نام نیشی شیر۔ ہموتے بو ݰوئے زمانا پت "ببر آباد" راوتانی۔ افو روئے ہمو نامیئکو نو بیتی بکر اباد ریکہ پرانی۔

چمر کھون:

(کھوار) چمرو کان۔

بروز:

(کلاݰوار) برونز بمعنی گھاس۔

دروس:

(کلاݰوار) بمعنی دروݯ۔ شہزادہ حسام الملک ریران کہ کلاݰ دورہ دروس پورا دروݯھو جنگل بیرائے وا ہیہ ژاغو دروݯھو اوغ بو مشہور بیرائے۔

---

(بشکریہ رسالہ "کھوار " انجمن ترقی کھوار ݯھترار)