Back
وار (زبان) ای ژانوینی اشناری۔ ژانوینی بیکین دیتی وارہ تبدیلی پیدا بیک کیہ عجیب لو نو۔ ماہرینان خیال ہیہ کی وختو سوم جُستہ زبان تبدیل باؤ گوئے وا ہے تبدیلی زبانو کمزوری نو بلکہ طاقت یا ترقی۔ کیہ زبان کی تان سورو وختو سوم جُستہ تبدیل یا بدل نو پرائے ہسے ختم بوئے۔ مگم زبانہ گیاک تبدیلی ہانی ارامہ بوئے کی ہیس زمانو رویانتین محسوس نوبوئے ہیس یعنی غیر مانوس اندازہ گوئے۔
وارہ تبدیلیو ای نݰان نوغ لفظان ساؤز بیک دی شیر۔ الفاظ ای زبانو بنیادی ضرورت شینی وا الفاظ کی نوہونی زبان دی نوبوئے۔ زمانو سوم جوستہ الفاظ ای وارہ شامل بونی وا پھتی الفاظ متروک دی بونی۔ای وارہ نوغ الفاظ ساوزبیکو مختلف طریقہ کار شینی، ہے طریقہ کارود تحتہ ای وارہ لفظان اضافہ بوئے۔وارہ لفظان ساوزبیکو وا اضافہ بیکو دی مختلف طریقہ کار شینی۔ ماحول اوچے زمانو حالاتان سوم جوستہ کیہ وارہ کیہ طریقہ کار بو اہمیتو حامل بونی وا کیہ وارا کیہ طریقہ کار۔ ای وارہ الفاظ ساؤز بیکو وا تخلیق بیکو لوٹ ذریعہ، یعنی ورڈ فارمیشنو اصول ہمیت شینی۔ ہمی چھور طریقہ کاران کھوارو مثالان سورا کی لوڑیتم ہمیت مزید اسپتین واضح بونی۔
• خور وارار گنیرو الفاظ (Loan w ord)
• مرکب الفاظ (Compound word)
• ترجمہ (Translation)
• تکرار (Reduplication)
وام گنیرو الفاظ (Loan w ord):ای وارو لفظان ای خور وار کوراک پھار گنی استعمال کوریک ای وارو ذخیرہ الفاظہ اضافہ کوریکو ای آسان طریقہ شیر۔کیہ ای زبانہ کیہ اشناریو بچین نام یا سرگرمیو بچین الفاظ نو اوشونی ہسے ہمیشہ خور وارار الفاظ گانی تان ضرورتو پورا کوئے۔ کیہ دی وار غیژی تان ژانو سورا نو روپھوئے وانہ روپھیکو بوئے، ہیغین دیتی ای وار کیہ دی شکلہ ای خور وارو لفظان مددو گانیر۔ انگریزی وارو بارا ہیہ لو مشہور کی انگریزی بوغدو شور سالو موژی تقریبا شورار زیاد زبانان سار الفاظ گانی شیر۔ انگریزی دنیو ترقی یافتہ وارمگم ہیہ دی غیژی روپھیکو نوبویان ۔ ہیہ قسمہ کھوار دی وختو ضرورتو سوم جُستہ خور واران ساری اثر گانی ہیتان سار الفاظ گانی شیر۔ کھوار ا مختلف واراری گیتی مستعمل بیرو لفظان ای کمہ مثال ہمیت شینی۔
فارسی:شنبہ،یکشنہ وا پورا ہفتو انوسان نام،چائے جوش ، محفوظ وغیرہ عربی :ثواب، اول،روح،ارواح،نیک،حاجی،صورت، وغیرہ ۔ اردو : بچ (بچ بیک)،چپاتی (چاپوتی)، سڑک، پلنگ۔ پشتو: پیغور،ماما، خو، لکہ۔
انگریزی: ration, corrupt ,wrong side, ,photo, please, good۔ position، disturb وام گنیرو الفاظ تان شکلو صورتو اصلی شکلہ گنی ای وارا استعمال بونی وا کیہ وت ہݰ دی بونی ہتیت بلکل تان شکلو صورتو اوچے ہوازو بدل کوری مقامی وارو حصہ ساؤزبونی۔ ہیتان لوڑی دی ہوݰ کورین نوبوئے کی ہیت خور وارار گیتی شینی رے۔
مرکب الفاظ (Compound word): ای زبانہ نوغ لفظ ساؤزبیکو ای طریقہ ہیہ کہ جو لفظ ایتو ݯوکی یا جو لفظان نس ایتو ݯوکی نوغ لفظ ساؤزبونی ہݰ لفظانتین مرکب الفاظ رینو بوئے۔ کھوارہ مرکب الفاظو طورہ نوغ لفظ ساؤزبیکو ای کمہ مثال ہمیت شینی۔ بوہت بوغوزو، تروپ چائے،غوڑی بمبور،ان پوشی، گوردوغ کارو،ݰا کیری وغیرہ.
ترجمہ (Translation) : خور واراری ترجمہ کوری ای وارہ الفاظ ساوزبیکو یا تخلیق بیک دی ای لوٹ ذریعہ شیر۔ مگم ہمونیہ پت کھوارہ ہیہ طریقہ کارو سورہ کوروم بیتی شیر نہ الفاظان ترجمو سورا توجہ دیونو بیتی شیر۔ای وارو لفظان خور وارہ ترجمہ کوریک آسقان مگم ہے ترجمہ بیرو لفظان رواج دیک مشکل وا ای چیلنجو باݰ کوروم۔ کیہ وت کی ہے ترجمہ ای وارہ گیتی کمیونٹی ہے لفظان قبول اریر تھے ہے وارو الفاظ جوݰونو بونی۔ البتہ ای کمہ اشناری ترجمو شکلہ کھوارا مستعمل بیتی شینی،ہے مستعمل بیرو الفاظان موژاری خوشان گیور1 (خوش آمدید)، رافیݰ نیزینی، ( کیمرہ )،ژانگ گوڑی (ایکس کوییٹر) مشٹہ دیھ (گلوبل ویلج ) موخ پاشیک (رونمائی ) موخان کتاب (فیس بک )ہمونیہ پت استعمالہ گیتی شینی۔
تکرار یا reduplication :لسانیاتو ای ٹرم کی ہیس ہتے ترتیب یا طریقوتین ریر کی ای لفظہ یا ہتے لفظو شروغو ای حصہ یا سٹریم ایغار زیاد دفعہ تکرا ر بیتی یا ای لفظ پورا یا ای نس جوبارا گیتی ای خور معنی دار لفظ ساوز بوئے۔ہے پراسیسوتین لسانیتو اصولو تحتہ تکرار یا reduplication رینوبویان۔ ہیہ ترکیب کھوارہ بو عام شیر کی ای لفظ تکرار بیتی یا ای لفظو نس تکرار بیتی نوغ لفظ ساؤز بویان مثالو طورہ،موخاموخ،پھوک پھوک،چان بی چانو،ٹھوخ ٹھوخ،موڑ موڑیسی، ݯھیک ݯھیکو ،بخابخی, څیڅیق وغیر. وارہ مختلف ذریعا نوغ لفظ ساوز بونی وا ہمیت وارو پروشٹی بیکو ذریعہ ساؤزبونی۔ ممکن شیر خور وارہ مختلف ماحول اوچے حالاتان وجہین دیتی ہموغار زیاد دی ذرایئع بونی مگم ای وارہ سفوسار زیاد نویوکو طریقہ کار ہمی چھور شینی۔
1. "خوش آمدید" پروشٹاریری تان کھوارہ مستعمل بہچی گیتی شیر، ہورو ترجمہ کوریکو کیہ خاص ضرورت نیکی۔ تاہم ترجمہ کورییلیک کہ ہوئے دی صحیح ترجمہ کوریلیک۔ "خوشان گیور" ہے لفظو صحیح ترجمہ نو۔ "خوش آمدید " معنی "تہ یا پسہ گیک مبارک بار"۔ فارسیہ "خوش" معنی "جم" یا "نیک"۔ خوشان بالکل نو۔ جؤو لو ہیہ کہ بو جونانتے "خوشان گیور" کہ ریتاؤ ایوالیوتے کیاغ ریس؟ ہݰ سریئران کہ کورہ نوغ کھوار ݯھیݯھیرو بندہ ترجمہ کوریکو کوشش کوری اسور۔ ہتے بندوتے نہ کھوار گیاو استائے نہ فارسی۔