Back To Main Page
ݯھترارو سفان سار ݰئیلی دیہان موژار ایغو نام میراگرام، کھیوتے کہ میراگرام نمبر ۱ رینی۔ میراگرام اوچے سنوغر ایئہ ݯوکیرو دیہہ وا ݰئیلیئہ دی ایتو ݯوکی ٹھور۔ ہمی جو دیہہ تان قدرتی ݰئیلیار علاوہ ثقافت اوچے ادبو لحاظہ دی پورا ݯھترارو سوم ݰئیلی نویوکو۔ افار میراگراموتے گیاک غیر ناغیر پون "دووتھان" تان نا واہڅیو بچین ضرب المثل۔ میر ولی میتارو دنیہ ہمو ذکر شیر:
تہ دوروتے پون مہ ژان، ݯوکتو غیر نا غیر
سنوغر عام طورہ زیارت خانو وجہین مشہور۔ مگم زیارت خانوسار علاوہ دی ہمی جو دیہان خور بو ادبی ثقافتی حوالہ شینی۔ بجانی لال، شاہ گلِ زار، مشہد اوچے افسر خان تان زمانا ݯھتراری ستھارو تاج بہچی اسونی۔ ہیتان سار علاوہ ہر دوری ستھاری اسونی وا ستھار ساوزیئک دی ہمیشہ ہیہ ژاغا بہچی گیتی شیر۔
بجانی لالو خاندانار پختون غازی خان (بلچو چیرمین) تان زمانا ݯھترارو ثقافتی میلیسان ژان اوشوئے۔ پختون غازی خانو ای څیق برارو نام محمد الدین اوشوئے۔ خاندانی روایاتان اثر دی اوشوئے وا محمد الدین ذہنی طورہ دی شاعرانہ مزاجو اوشوئے۔ ہسے کالجہ طالبعلمیو زمانا تان "چراغ" تخلص لکھی شاعری شروع کوری اسیتائے۔ تعلیمار فارع بیتی ہسے افغان ریفیوجی کمشنیریٹہ ملازم ہوئے، وا ہے زامانا ہورو کلام شائع بیک شروع ہوئے۔ ہیس ݯھترارو مشاعرین دی شرکت کوریکہ پرائے۔ ہسے زمانو موژی ہتو اݱغال لہاز بیتی وفات ہوئے۔ ہسے بو حساس طبیعتو انسان اوشوئے وا اݱغالو سوم ہتو بو محبت اوشوئے۔ ہیہ حادثہ ہتو ذہنو سورہ اثر کوری ہسے جوانیہ تان وفات ہوئے۔
تان مختصر زندگیہ ہسے کافی شاعری کاردو بیرائے۔ ہتو شاعریو څیق حصہ جمہور اسلام رسالہ شائع بیتی اوشوئے۔ انجمن ترقی کھوار نامور شاعرانان کڑومان کیہ مجموعہ کہ ترتیب دیتی "ققنوز" نامو سورہ چاپ کوری اسیتائے، ہتے موژو چراغو غزل شامل شینی۔ ہتو بعض کڑومان ہنگ دیتی بشئے دی اسونی وا ریڈیو پاکستانہ ہیتان ریکارڈ محفوط شینی۔
چراغو کلامو خصوصیت تعزل۔ ہتو شعرہ غزلو تمامی نعمگی اوچے نزاکت غیچی گونیان۔ دنیو بے ثباتی اوچے نا امیدیو احساسات ہورو کلامہ بو۔ ہݰ سریئران کہ ہوروتے تان سورہ گیاک حالاتان احساس پروشٹی تان بیتی اوشوئے۔
کلامو نمونہ
فریب پوشیتام اوا، نہ دی کوس وفو لیتام
خور کیہ چارہ نو توری تان اللہو دوسی اسوم
اسوس غیچھار دودیری، ارمان تہ پوشیکو بچین
بوسی اخر روبرو، ہے انوسو ویسی اسوم
غمان ہردیہ ٹیپئے، اینگار تہ پشیئکو بچین
اشروان غیچی کسئے ہر غوزارہ ہوسی اسوم
ای خور غزل
ځوخ دی گلاب غیری مہ غیچی گونیان
اشرو شراب غیری مہ غیچی گونیان
مہ دردو قصہ تہ نظرہ پنہان
تہ غیچ کتاب غیری مہ غیچی گونیان
مہ یادی گویان، نست جگر اوشونی
نیسین کباب غیری مہ غیچی گونیان
مہ پاک اللہئے تہ رحمتان پروشٹہ
گناہ ثواب غیری مہ غیچی گونیان
کیچہ ہمت ہتے نادان استاریان
ہنون افتاب بیتی مہ غیچی گونیان
چراغ انگاہ اسیکہ خوشپ پشیمان
می خوشپ عذاب غیری مہ غیچی گونیان
محمد الدین چراغ نہ صرف میراگرامو ادبی ثقافتی پس منظرو سوم خاندان چشم و چراغ اوشوئے بلکہ کھوار شاعریو ای ڑوپھیئاک چراغ دی۔ افسوس ہیہ چراغ ویزین وغتو تان گُل بیتی میلیسو ٹونگ ٹانگ اریر۔